“Jien nagħmel parti mis-sezzjoni tal-proġetti, fejn nieħdu ħsieb li nimplimentaw Ċentri ta’ Distribuzzjoni ġodda u upgrades f’dawk eżistenti, skond l-eżiġenzi tan-network u l-iżvillupp fil-bini. Parti kbira minn xogħolna huwa l-ippjanar, ix-xiri, l-installazzjoni u l-ittestjar tat-tagħmir. Sabiex nagħmlu dan, naħdmu ma’ diversi kuntratturi ta’ kumpaniji kbar ibbażati barra minn Malta – li ttina opportunita’ nitgħallmu minn xulxin.

Apparti minn dan, nassisti ukoll waqt ħsarat li jinqalgħu fin-network tal-Enemalta madwar il-pajjiż sabiex nagħtu l-provvista tal-elettriku minn sors alternattiv sakemm tissewwa il-ħsara.

L-ikbar kisba tiegħi fl-Enemalta kienet meta beda jintuża l-interconnector, fejn jien kont parti mit-tim  li ħa ħsieb l-implimentazzjoni tal-proġett.

Dan ix-xogħol nagħmlu flimkien ma’ tim żagħżugħ u ambizzjuz, li flimkien naħdmu biex nagħmlu xogħolna fil-ħin u bl-akbar professjonalita’.” – Inġ Karen Vella Mulvaney, Primary Nodes and Networks

“Bdejt naħdem mal-Enemalta ta’ dsatax-il sena bħala apprentist fl-ewwel sena tal-kors . Illum inservi bħala Manager tat-tim li jiżviluppa sistemi kompjuterizzati  li jgħinu fl-operat tal-Enemalta . Bħala tim tista’ tgħid li hawn atmosfera ta’ familja.

Meta taħdem f’kumpanija li tipprovdi servizz essenzjalitħoss responsabbiltà kbira. F’dawn is-snin ħdimt fuq diversi proġetti b’teknoloġiji varji ma’ kumpaniji internazzjonali kbar.

 

L-ikbar kisba seħħet fl-2021, meta wara sena u nofs ta’ ħidma, minkejja li ħabbatna wiċċna mad-diffikultajiet li ġabet magħha l-pandemija, it-tim tal-IT tal-Enemalta nieda l-progett tal-Paperless . B’hekk l-Enemalta m’għadhiex tiftaħ files fiżiċi  iżda permezz ta’ proġett tat-tim, dawn qegħdin jinfetħu fuq portal diġitali .” – Klaus Paul Camilleri, Manager Integrated Solutions

“Jien bdejt mal-Enemalta bħala apprentist u llum il-ġurnata inġinier ġewwa l-control room tal-Marsa. L-irwol prinċipali tiegħi hu li nikkoordina xogħolijiet ta’ manutenzjoni li jsiru fuq in-network ta’ vultaġġ għoli u medju . F’kas ta’ qtugħ t’emerġenza minħabba ħsarat, nassisti lill-inġiniera fuq barra . Fejn hu possibbli, permezz ta’ mezzi diġitali t’automation, mill-control room nistgħu nagħtu s-servizz lura lill-konsumaturi f’ħin qasir . Għalina hija sfida li nixgħelu lill-konsumaturi fl-inqas ħin possibbli . L-ikbar kisba tiegħi kienet meta assistejt biex jiġi tiġi restawrata il-provvista tal-elettriku fl-inqas ħin possibbli waqt qtugh estensiv li affettwa parti kbira mill-pajjiż.

Mill-ewwel ġurnata tiegħi fl-Enemalta sibt għajnuna kbira mill-ħaddiema kollha f’kull sezzjoni fil-kumpanija . Ix-xogħol tiegħi fil-control room għallimni l-kunċetti kumplessi tad-distribuzzjoni tal-elettriku ġewwa pajjiżna; u tgħallimt nieħu deċiżjonijiet għaqlija fl-iqsar ħin possibbli billi nikkoordina inġiniera fuq barra bl-aktar mod effiċċjenti u sigur.” – Inġ. Daniel Farrugia