Is-sostenibbiltà finanzjarja ta’ Enemalta kkonfermata mill-ġdid minn Standard & Poor’s

Għas-seba’ sena konsekuttiva, Standard and Poor’s, fl-analiżi tagħha tal-Enemalta plc, reġgħet affermat l-isforzi mwettqa mill-kumpanija biex tipprovdi prezz raġonevoli u sigurtà fil-provvista tal-elettriku, fl-istess waqt li tiżgura s-sostenibbiltà ambjentali u finanzjarja tas-servizzi tal-elettriku f’Malta.

Ilbieraħ, l-aġenzija internazzjonali ta’ kreditu kkonfermat il-klassifikazzjoni tal-kreditu BB- u l-profil tal-kreditu B-stand-alone lil Enemalta, bi prospetti stabbli għas-snin li ġejjin. Din il-kisba hija kontinwazzjoni fl-appoġġ ta’ Standard & Poor’s fil-pjan fit-tul ta’ trasformazzjoni ta’ Enemalta mill-2014 (għal enerġija iktar nadifa u sostenibbiltà finanzjarja) meta bdiet ittejjeb il-klassifikazzjoni tal-kreditu tagħha u l-profil ta’ kreditu awtonomu.

Standard & Poor’s enfasizzat il-fatt li l-varjeta’ ta’ sorsi ta’ enerġija użati fil-ġenerazzjoni tal-elettriku, inklużi l-impjanti Delimara 3 u Delimara 4, li jaħdmu bil-gass, u l-Interconnector bejn Malta u l-Italja, qed jiżguraw b’mod adegwat is-sigurtà tal-provvista tal-elettriku meħtieġa fil-Gżejjer Maltin kif ukoll livell suffiċjenti ta’ kapaċità għall-futur. F’dan ir-rigward, l-aġenzija qed tbassar żieda annwali ta’ 3.5% għal 4% fil-konsum tal-elettriku matul l-2019 u l-2020.

Dan ir-rapport jenfasizza l-fatt li l-Enemalta “qed tiffoka mill-ġdid fuq is-servizz offrut lill-klijenti tagħha – diġà rajna tnaqqis f’interruzzjonijiet tekniċi relatati mad-distribuzzjoni tal-enerġija u titjib fil-provvista tal-elettriku” sostniet l-aġenzija ta’ kreditu. Flimkien ma’ dan, Standard & Poor’s enfasizzaw l-isforzi pożittivi meħuda minn Enemalta biex jitnaqqsu l-ispejjeż u titjieb il-kwalità tal-provvista tal-elettriku bi strateġija bbażata fuq il-kunċett li l-konsumatur jiġi l-ewwel.

“L-investimenti tal-kumpanija jiffokaw fuq it-titjib tan-netwerk ta’ distribuzzjoni tagħha, bl-iżvilupp tan-netwerk ta’ vultaġġ għoli fis-snin preċedenti u l-espansjoni tan-netwerk ta’ vultaġġ baxx fis-snin li ġejjin. Enemalta qed issegwi standards operattivi tajbin li joffru sodisfazzjon lill-konsumatur” irrimarkat l-aġenzija ta’ kreditu.

Fil-valutazzjoni annwali tagħha dwar l-operat ta’ Enemalta, Standard & Poor’s għal darb’oħra irrimarkat b’mod mill-aktar pożittiv dwar it-tmexxija u l-governanza tal-Kumpanija, tant li argumentat li l-“maniġment tal-kumpanija qed jopera aktar b’mod indipendenti fil-proċess tat-teħid ta’ deċiżjonijiet strateġiċi li huma relatati mal-mudell operattiv li mplimentat fl-aħħar snin.”

Kevin Chircop, iċ-Chairman tal-Kumpanija, laqa’ b’sodisfazzjon ir-reviżjoni ta’ Standard & Poor’s fl-istess waqt li kkummenta li “dan ir-rapport juri biċ-ċar li Enemalta qed issaħħaħ il-pożizzjoni tagħha skont id-direzzjoni mogħtija mill-bord tad-diretturi, liema direzzjoni toffri opportunitjiet li jistgħu jiġu sfruttati fil-futur. ”

Min-naħa tiegħu, l-Ing. Jason Vella, il-Kap Eżekuttiv tal-Kumpanija, iddeskriva r-reviżjoni ta’ Standard & Poor’s bħala inkoraġġiment ulterjuri fit-tisħiħ tal-operat ta’ Enemalta lejn stabilita’ finanzjarja, aktar effiċjenza u servizz ta’ livell għola mogħti lill-klijenti.

“Bħala kumpanija għandna impenn ċar li noffru servizz tal-għola livell lill-klijenti tagħna li jkun finanzjarjament vijabbli, u r-rapport ta’ Standard & Poor’s tikkonferma li Enemalta miexja fid-direzzjoni t-tajba, għall-benefiċċju kemm tal-kumpanija kif ukoll tal-klijenti tagħha, ” sostna l-Ing. Vella.

 

Jibda t-twaqqigħ tal-impjant u ċ-ċumnija tal-HFO f’Delimara

31.05.2018

Enemalta plc kompliet iżżarma l-aħħar impjant tal-heavy fuel oil fid-Delimara Power Station, kif ukoll iċ-ċumnija twila tiegħu.

Ftit tal-jiem ilu, l-kuntratturi tat-twaqqigħ tal-Kumpanija bdew iħottu iċ-ċilindru tal-konkos li kien iservi bħala lqugħ tul il-50 sular taċ-ċumnija.

Iċ-ċumnija tal-impjant tinkludi struttura ċilindrika tal-konkos m’għola 50 sular, b’diametru ta’ 12-il metru. Il-ħitan tagħha għandhom ħxuna ta’ 80 ċentimetru fil-qiegħ u 30 ċentimetru fil-quċċata. Ġewwa din l-istruttura tal-konkos kien hemm żewġ pajpijiet b’wisa’ ta’ 2.3 metri li minhom kien joħroġ id-duħħan tal-ħarqa tal-boilers.

Il-proċess taż-żarmar beda bit-tneħħija tal-aktar parti baxxa ta’ dawn iż-żewġ pajpijiet tal-ħadid, li jgħaqqdu ċ-ċumnija maż-żewġ boilers. Il-kumplament tal-pajpijiet tal-ħadid, slielem u pjattaformi oħra tal-ħadid li hemm aktar ‘il fuq ġewwa ċ-ċumnija tniżżlu mal-art sbiex setgħu jiżżarmaw b’mod sikur.

Fl-istess waqt, barra l-ħitan taċ-ċumnija, il-kuntratturi rama’ pjattaforma titla’ u tinżel awtomatikament fuq ħames kolonni li baqgħu tielgħin sal-quċċata tal-istruttura. Issa li l-ħadid kollu ġewwa ċ-ċumnija tneħħa, beda l-proċess ta’ remote-controlled demolition robots fuq il-pjattaforma li bdew ikissru l-ogħla parti ta’ 1.5 metri taċ-ċumnija. Malli titlesta din il-parti, l-pjattaforma titniżżel 1.5 metri sabiex ikompli t-twaqqigħ ta’ biċċa oħra. Il-biċċiet tal-konkos ser jitniżżlu l-art minn ġewwa ċ-ċumnija stess, sabiex jitnaqqsu t-trabijiet. X’ħin ikun fl-art, jitbgħabba fuq trakkijiet sabiex jinġarr.

Il-proċess gradwali ta’ żarmar permezz tal-pjattaforma mistenni jiġi ripetut madwar 80 darba sakemm iċ-ċumnija titniżżel għal 35 metru. F’dan l-istadju, l-pjattaforma titneħħa u l-kumplament taċ-ċumnija titkisser permezz ta’ high reach demolition excavator minn mal-art.

Fl-istess waqt, ħaddiema oħra lestew iż-żarmaw taż-żewġ boilers u apparat anċillari ieħor.     Kull ma baqa’ hija struttura waħda li ser tinżamm biex isservi bħala store hekk kif din ser titniżżel fl’art.

Dan il-proġett, li mistenni jitlesta aktar tard din is-sena jinkludi t-twaqqigħ sħiħ taċ-ċumnija tal-konkos u l-ħadid, li tiżen kważi 9,000 tunnellata, jew madwar 6,000 karozza, kif ukoll il-boilers, it-turbini u t-tagħmir kollu ta’ dan l-impjant.

Il-materjal tal-impjant qed jiġi separat fuq il-post stess qabel ma jittieħdu lejn postijiet awtorizzati tal-iskart jew tar-riċiklaġġ awtorizzati. Aktar minn 5,400 metru kubu ta’ konkos u materjal ieħor tal-bini ser jitneħħew mis-sit. Mal-5,300 tunnellata ta’ ħadid mistennija jiġu esportati għar-riċiklaġġ.

L-impjant Delimara 1, li beda jopera fl-1992 b’żewġ turbini ta’ 60 megawatt-il waħda, intefa sabiex jinżamm cold standby għal każi ta’ emerġenza f’April 2017, sakemm ġie ddikjarat dekommissjonat kompletament fl-1 ta’ Settembru. Ftit tal-jiem wara, l-kuntrattur Taljan tat-twaqqigħ magħżul għal dan il-proġett beda jġib fuq il-post l-inġenji u apparat ieħor meħtieġa għaż-żarmar.

Inġ. Jason Vella, Chief Executive office, ta’ Enemalta plc, spjega kif dan il-proġett huwa parti minn programm wiesgħa ta’ immodernizzar fil-ġenerazzjoni, biex inwasslu enerġija aktar nadifa lill-klijenti tagħna, b’hekk inaqqsu l-impjant ambjentali.

L-ingineer Vella, irringrazzja lill-impjegati tal-Enemalta għal ħidma kontinwa tagħhom ġewwa Delimara Power Station.