Meta ssir klijent ta’ Enemalta

Aktarx issir klijent ta’ Enemalta għall-ewwel darba mal-ewwel proprjetà tiegħek. Għaldaqstant, ikollok bżonn tapplika għal servizz ġdid tal-elettriku jew taqleb f’ismek servizz tal-elettriku ġa eżistenti.

Biex titlob servizz ġdid tal-elettriku (Formula ta’ Applikazzjoni Ae) jew biex taqleb f’ismek servizz ġa eżistenti (Formula ta’ Applikazzjoni F), inti mitlub timla l-formuli ta’ applikazzjoni rispettivi, tehmeż id-dokumenti meħtieġa u tibgħathom lil ARMS.

Aqra bir-reqqa dawn il-formuli ta’ applikazzjoni fosthom il-lista ta’ dokumenti li għandna bżonn nirċievu sabiex inkunu nistgħu nipproċessaw l-applikazzjoni tiegħek. Il-formuli jinkludu wkoll tagħrif dwar xi tariffi applikabli.

Kif taqleb kont ġa eżistenti 
Jekk ser tixtri proprjetà li għandha provvista tal-elettriku, is-sidien preċedenti jridu jimlew u jiffirmaw il-partijiet rilevanti tal-Formula ta’ Applikazzjoni F u jħallsu l-ammont dovut li baqa’ pendenti fuq il-kont tagħhom sad-data tal-kuntratt ta’ bejgħ. Jekk is-sidien preċedenti tal-proprjetà li ser tixtri, ma jħallsux il-kontijiet pendenti tad-dawl u l-ilma ma’ ARMS, ma tkunx tista’ taqleb il-kont fuq ismek.

Kif nagħtuk il-provvista
Qabel ma tapplika għal servizz ġdid, kun żgur li ċ-ċirkwiti elettriċi interni huma konformi mal-istandards u regolamenti hekk kif stabbiliti fir-Regolamenti dwar il-Provvista tal-Elettriku (L.S. 545.01), ir-Regolament dwar l-Installazzjonijiet tal-Elettriku (L.S. 545.39) u l–Kodiċi tan-Network. Jeħtieġ ukoll li tipprovdilna spazju adegwat sabiex ninstallaw il-kaxxa tal-main fuse tad-dawl, il-meter tal-elettriku u appart ieħor meħtieġ ghas-servizz tiegħek tal-elettriku. Dan l-ispazju jeħtieġ Ii jkun kemm jista’ jkun possibli qrib id-daħla tal-proprjetà. F’ċerti każijiet, nistgħu wkoll ngħaddulek istruzzjonijiet preċiżi dwar il-post fejn għandhom jitwaħħlu kemm il-kaxxa tal-main fuse tad-dawl kif ukoll il-meter tal-elettriku, skont il-leġislazzjoni applikabli.

Ladarba l-applikazzjoni tiegħek għal servizz ġdid tiġi pproċessata u jitħallsu t-tariffi kollha applikabli, nipprovduk bi provvista tal-elettriku mill-iktar fis possibli fi żmien 21 jum. Dan sakemm ma jkunux meħtieġa xogħlijiet addizzjonali fl-iżvilupp tan-network. Ix-xogħlijiet addizzjonali fl-iżvilupp tan-network huma meħtieġa f’żoni fejn it-talba għal servizz ġdid ma tintlaħaqx min-network eżistenti, jew il-kapaċità eżistenti tan-network teħtieġ tiġi estiża sabiex takkomoda s-servizzi li għandek bżonn.

Dawn ix-xogħlijiet jistgħu jinkludu l-estensjoni jew l-installazjonijiet ta’ linji ta’ barra ġodda jew cables ta’ taħt l-art u kull apparat ieħor ta’ trasmissjoni meħtieġ sabiex jagħtik provvista xierqa. F’sitwazzjonijiet bħal dawn, ikollna bżonn iktar żmien sabiex nipprovduk bi provvista skont x’jinvolvu x-xogħlijiet.

Għal konnessjoni tiegħek, kultant nużaw ukoll materjal addizzjonali u apparat speċifiku. Jekk dak ikun il-każ, nagħtuk stima tal-ispejjeż meħtieġa fi żmien 30 ġurnata tax-xogħol mid-data tal-validazzjoni tal-applikazzjoni. Ladarba tħallas dawn l-ispejjeż addizzjonali (skont iż-żmien stipulat), jibdew ix-xogħiljiet meħtieġa ħalli nipprovdulek il-provvista tal-elettriku mill-iktar fis possibli. Jekk ma taqbilx ma’ dawn l-ispejjeż addizzjonali, tista’ tikkanċella l-applikazzjoni tiegħek jew tmexxi l-każ tiegħek lir-Regolatur għas–Servizzi tal-Enerġija u l-Ilma għall-evalwazjoni tagħhom. Malli l-applikazzjoni tiġi kkanċellata, nagħtuk lura xi spejjeż imħallsa, bl-eċċezzjoni tat-tariffa amministrattiva tal-ipproċessar.

Speċifikazzjonijiet tas-servizz tekniku

Aħna impenjati li nagħtuk servizz mill-aqwa skont ir-regolamenti applikabbli u l-istandards internazzjonali.

Dawn huma l-livelli ta’ servizz tekniku tal-provvista tal-elettriku li nipprovdulek.

Vultaġġ tas-Sistema
In-netwerk tas-sistema tad-distribuzzjoni ta’ Malta jopera b’dawn il-vultaġġi nominali:

Vultaġġ Baxx (LV)	230 V – minn phase għal neutral
Vultaġġ Baxx (LV)	400 V – minn phase għal phase
Vultaġġ Medju (MV)	11,000 V (11 kV)
Vultaġġ Medju (MV)	33,000 V (33 kV)

L-inġiniera u t-tekniċi tagħna jimmonitorjaw u joperaw is-sistema tad-distribuzzjoni sabiex jiżguraw li l-vultaġġ tal-provvista tiegħek iżomm ma’ dawn il-livelli. Is-servizzi tal-elettriku residenzjali jiġu pprovduti permezz tal-medda ta’ vultaġġ baxx. It-tolleranza ta’ din il-medda għandha tkun ta’ 230 V +/- 10% (minn phase għal neutral). Il-vultaġġ li jirriżulta f’punti differenti tas-sistema jiddependi fuq bosta fatturi, iżda huwa mistenni li jkun skont it-tabella li ġejja, fi stat stabbli u f’kundizzjonijiet operattivi normali.

Vultaġġ nominali	Tolleranza fi stat stabbli	Vultaġġ tal-impuls
230 V (single phase)	±10%	6 kV
400 V (bejn il-phases)	±10%	6 kV
11 kV (bejn il-phases)	+5, -5%	75 kV
33 kV (bejn il-phases)	+5, -10%	170 kV

Frekwenza tas-Sistema
Il-frekwenza nominali tal-vultaġġ tas-sistema tad-distribuzzjoni hija 50 Hz. Il-mira tagħna hija li nżommu ċ-ċaqliq fil-frekwenza kumulattiva fuq perjodu ta’ 30 jum kemm jista’ jkun qrib iż-żero. F’kundizzjonijiet operattivi normali, il-valur medju mkejjel fuq 10 sekondi tal-frekwenza fundamentali għandu jkun f’medda ta’:

50 Hz ± 1% (jiġifieri 49.5 sa 50.5 Hz) matul 99.5% ta’ sena;

50 Hz ± +4% (jiġifieri 47.5 sa 52.0 Hz) matul 100% tal-ħin.

Diffikultajiet fil-livelli tas-servizz
Jekk taħseb li l-livelli tal-vultaġġ u tal-frekwenza tas-servizz tagħna mhumiex fil-limiti speċifikati, inti mħeġġeġ tirrapporta t-tħassib tiegħek lit-tim ta’ Għajnuna lill-Klijenti tagħna immedjatament. Ir-rapport tiegħek jiġi investigat f’anqas minn 30 jum. Jekk ikun meħtieġ xi intervent biex insolvu d-diffikultajiet tiegħek, aħna nfittxu li nimplimentawhom mill-aktar fis possibbli, fi żmien 30 jum wara l-konklużjoni tal-investigazzjonijiet, sakemm ma jkunux meħtieġa xogħlijiet estensivi ta’ żvilupp tan-netwerk.

Kodiċi tan-Netwerk
Il-Kodiċi tan-Netwerk li huwa ppubblikat minn Enemalta plc bħala l-Operatur tas-Sistema tad-Distribuzzjoni f’Malta, jiddefinixxi l-kriterji tas-sigurtà teknika u r-regoli tekniċi li jistabbilixxu d-disinn tekniku u r-rekwiżiti operattivi minimi għall-konnessjoni mas-sistema ta’ installazzjonijiet ta’ ġenerazzjoni, is-sistema tad-distribuzzjoni, direttament imqabbda mal-apparat tal-konsumatur, iċ-ċirkwiti tal-interconnector u l-linji diretti. Dan il-kodiċi jistabbilixxi r-regoli u l-obbligi operattivi minimi dwar is-sigurtà tan-netwerk u ċ-ċirkustanzi prevedibbli li fihom għandha tinżamm is-sigurtà.

Il-kejl tal-konsum tiegħek

Il-konsum tal-elettriku tiegħek jiġi mkejjel f’kilowatt kull siegħa (kWh). Kilowatt wieħed kull siegħa huwa l-ammont ta’ enerġija elettrika kkunsmata meta tixgħel apparat elettriku b’rata ta’ 1,000 watt kull siegħa. Fil-kont tiegħek, kilowatt wieħed kull siegħa huwa rrappreżentat bħala unità waħda.

Klijenti b’livelli għoljin ta’ konsum li huma mqabbdin permezz ta’ cables iddisinjati għal provvista tal-elettriku jirċievu qari f’kilovolt-ampere fis-siegħa (kVAh). Din l-unità tirrappreżenta enerġija elettrika ta’ 1,000 volt-amperes imxerrda kontinwament għal perjodu ta’ siegħa.

Il-konsum tiegħek tal-elettriku jiġi mkejjel permezz tal-meters tal-elettriku installati fil-proprjetà tiegħek. Inkejjlu l-konsum tal-elettriku permezz ta’ smart meters li huma kapaċi jittrasmettu minn għandek għal għandna bid-data tal-konsum tiegħek tal-elettriku. L-ismart meters jipprovduk ukoll b’informazzjoni addizzjonali, fosthom qari tal-konsum tiegħek ta’ kuljum billi sempliċement tagħfas buttuna. Dan sabiex jgħinek tosserva u tikkontrolla l-użu tiegħek tal-enerġija.

F’ċerti każijiet, ARMS jistgħu xorta waħda jkollhom bżonn jibagħtu uffiċjal li jaqra l-meter sabiex jieħu nota tal-qari tal-ismart meter tiegħek għal skopijiet ta’ kont. Jekk ma tagħtihx aċċess fil-proprjetà tiegħek, l-uffiċjal li jaqra l-meter iħalli nota li fiha jindika data għat-tieni appuntament. Jekk it-tieni darba jiġri l-istess, tirċievi nota li titolbok tissottometti l-qari lil ARMS fi żmien ħamest’ijiem. Wara dan il-perjodu tista’ xorta tissottometti l-qari tiegħek biex titlob kont aġġornat, iżda tariffa minima tkun applikabli. Għal iktar tagħrif dwar is-sottomissjoni tal-qari tal-konsum tiegħek, tista’ żżur is-sit elettroniku ta’ ARMS.

Il-meter tal-elettriku l-qodma
Jekk għadek bil-meter il-qadim installat fil-proprjetà tiegħek, inti mħeġġeġ tgħarraf lit-tim tagħna li joffri assistenza għall-klijenti sabiex jiġi mibdul ma’ smart meter. Sakemm il-meter tiegħek ma jinbidilx, l-uffiċjali li jaqraw il-meter se jibqaw iżuru l-proprjetà tiegħek b’mod regolari biex jieħdu nota tal-konsum tiegħek.

Flimkien ma’ ARMS, nistgħu noffrulkom servizzi online addizzjonali relatati mal- ismart meter tiegħek. Inżommukom aġġornati bid-dettalji dwar dawn is-servizzi.

Testijiet tal-meter
Jekk tissuspetta li l-meter tiegħek mhux qed jirreġistra l-konsum tal-elettriku b’mod korrett, tista’ tapplika għal test tal-meter billi tissottometti l-formula ta’ applikazzjoni rispettiva (He), flimkien mal-ħlas tat-tariffa applikabbli, lil ARMS. Aħna nimpenjaw ruħna sabiex nittestjaw il-meter tiegħek u ninfurmak dwar ir-riżultat fi żmien 30 jum mid-data tal-applikazzjoni għal dan is-servizz.

Jekk it-test jikkonferma li l-meter qiegħed jirreġistra l-konsum b’mod mhux korrett, il-ħlas tal-applikazzjoni jingħata lura fil-kont tiegħek u tittieħed azzjoni immedjata sabiex jissewwa jew jiġi mibdul il-meter. Enemalta tavża wkoll lil ARMS sabiex tirrevedi l-konsum ta’ qabel li ġie rreġistrat mill-meter u tirranġa l-kont tiegħek kif xieraq.

Tariffi, kontijiet u ħlasijiet

Il-proċessi tal-ħruġ u l-ħlasijiet tal-kontijiet tal-elettriku jitmexxew mill-ARMS .

Tariffi applikabbli
It-tariffi applikabbli għas-servizzi tal-elettriku huma regolati mir- Regolamenti fuq il-Provvista tal-Elettriku (S.L. 545.01) u awtorizzati mir-Regolatur għas-Servizzi tal-Enerġija u l-Ilma . It-tariffi tal-elettriku jinkludu tariffa annwali għas-servizz kif ukoll rata tal-konsum għal kull unità tal-elettriku li tiġi kkunsmata. Dawn it-tariffi jvarjaw skont it-tip ta’ servizz (residenzjali, domestiku jew nonresidenzjali), kif ukoll skont l-ammont ta’ elettriku li tuża.

It-tariffi tagħna huma bbażati fuq konsum kumulattiv annwali. Madankollu, minħabba l-fatt li l-qari tal-meter ma jitteħidx fuq bażi annwali, it-tariffi jiġu applikati fuq bażi prorata, skont in-numru ta’ ġranet koperti minn kull kont li tirċievi. Fejn applikabbli, din il-proċedura tapplika wkoll għall-ekoriduzzjoni.

Dawn huma t-tariffi tal-elettriku tagħna bħalissa. Kwalunkwe bidla f’dawn it-tariffi titħabbar b’mod pubbliku minn qabel:

Irreferi għas-sit elettroniku tal-ARMS għal aktar spjegazzjoni dwar kif jiġu kkalkulati l-kontijiet tiegħek.

F’xi każijiet, jekk għal xi raġuni ma nkunux nistgħu niksbu l-qari propju tal-meter tiegħek, inti tista’ tirċievi kontijiet ibbażati fuq stima tal-konsum. Kwalunkwe diskrepanza bejn l-istima u l-konsum reali tiġi rikonċiljata malli l-qari tal-meter tiegħek ikun disponibbli.

Meta, għal xi raġuni, ma nkunux nistgħu niksbu l-qari propju tal-meter tiegħek, aħna xorta waħda nibagħtulek kont ibbażat fuq stima tal-konsum. F’każijiet bħal dawn, l-ARMS tfittex li tikseb il-qari reali tal-konsum tiegħek u tibgħatlek kontijiet ibbażati fuq il-konsum reali mill-anqas darbtejn fis-sena. Jekk tirċievi kontijiet ibbażati fuq stima tal-konsum, inti tista’ tissottometti l-qari tal-meter tiegħek lill-ARMS sabiex tirċievi kont aġġornat. Tista’ żżur www.smartutilities.com.mt għal opzjonijiet differenti dwar kif tista’ tibgħat il-qari tal-meter tiegħek lill-ARMS.

L-ARMS normalment tibgħatlek il-kontijiet bil-posta. Jekk tippreferi, l-ARMS tista’ toffrilek ukoll li tibgħatlek il-kontijiet b’mod elettroniku.

Inti trid tħallas kull kont sad-data tal-ħlas imniżżla biex tevita li teħel ħlasijiet u interessi addizzjonali għall-ħlas tard. L-ARMS toffri metodi differenti ta’ ħlas għall-kumdità tiegħek. Kull metodu huwa spjegat b’mod ċar fl-informazzjoni li tirċievi ma’ kull kont.

Il-mod ta’ ħlas preferut
Il-mod ta’ ħlas l-aktar konvenjenti u kosteffettiv għall-klijenti b’kontijiet Domestiċi u Residenzjali huwa l-ħlas dirett mill-kont tal-bank tiegħek (direct debit). Permezz ta’ dan is-servizz, inti tiżgura li tevita l-konsegwenzi ta’ ħlas tard u tgawdi minn skont ta’ 2% (jew €3, skont liema jkun l-ogħla) fuq kull kont li tirċievi. Il-ħlas jinġibed b’mod awtomatiku mill-kont tal-bank tiegħek 15-il jum wara li jintbagħatlek il-kont. Għal aktar tagħrif dwar kif tapplika għal dan il-metodu ta’ ħlas vantaġġjuż, tista’ tirreferi għall-informazzjoni pprovduta fl-kont tiegħek jew tikkuntattja lill-ARMS.

Il-ħlas bid-direct debit ma jnaqqaslek xejn mid-dritt li toġġezzjona dwar l-eżattezza tal-kontijiet tiegħek, kif se jiġi spjegat aktar ’il quddiem f’din it-taqsima. Xorta waħda tkun tista’ titlob lill-ARMS jirrieżaminaw il-kontijiet tiegħek jekk tħoss li dawn għandhom jiġu kkoreġuti. Jekk it-talba tiegħek tiġi kkonfermata, inti tiġi rimborżat kif meħtieġ.

Diffikultajiet fil-ħlas
Aħna nifhmu li, kultant, jista’ jkun li ssibha diffiċli biex tħallas il-kontijiet tiegħek fil-ħin. F’sitwazzjonijiet bħal dawn, jekk jogħġbok ikkuntattja lill-ARMS kemm jista’ jkun malajr qabel id-data ta’ ħlas speċifikata fil-kont tiegħek, biex tfittex soluzzjonijiet alternattivi. Dawn l-opzjonijiet jistgħu jinkludu arranġamenti biex tħallas il-kontijiet pendenti tiegħek bin-nifs b’pagament kull xahar. L-aġenti ta’ għajnuna lill-klijenti tal-ARMS jgħinuk tidentifika l-aħjar opzjoni biex tħallas id-djun tiegħek filwaqt li tevita aktar kumplikazzjonijiet.

Nuqqas ta’ ħlas u sospensjoni tal-provvista tal-elettriku
Jekk tonqos milli tħallas il-kont tiegħek fiż-żmien speċifikat, inti teħel l-interessi u ħlasijiet oħra għall-ħlas tard. Aħna nibagħtulek ukoll notifiki biex infakkruk tħallas id-djun tiegħek fil-kontijiet li jmiss, kif ukoll avviż finali ta’ sospensjoni li jinfurmak biex tħallas id-djun tiegħek fi żmien speċifikat biex tevita li l-provvista tiegħek tiġi sospiża.

Sfortunatament, hemm sitwazzjonijiet fejn l-Enemalta u l-ARMS ma jkollhom l-ebda għażla oħra ħlief li jitolbu s-sospensjoni tal-provvista tal-elettriku tiegħek. Dawn is-sitwazzjonijiet jinkludu:

• meta tonqos li tħallas il-kontijiet pendenti tiegħek mingħajr ma tilħaq arranġamenti ta’ ħlas bin-nifs mal-ARMS;
• meta ma żżommx mal-kundizzjonijiet ta’ ftehim ta’ ħlas bin-nifs billi ma tħallasx il-pagamenti;
• meta ma tħallasx kontijiet għall-ħlas ta’ elettriku mhux irreġistrat minħabba serq jew irregolaritajiet oħra.
• Qabel ma tinqatagħlek il-provvista, jintbagħatlek avviż ta’ sospensjoni. Dan l-avviż jinfurmak b’mod ċar meta tkun se tinqatagħlek il-provvista u li din tkun tista’ tingħatalek lura biss wara li tħallas id-djun kollha (jew tilħaq ftehim ta’ ħlas bin-nifs mal-ARMS) u tħallas it-tariffi applikabbli biex tingħata lura l-provvista.

Ladarba tħallas, il-provvista tal-elettriku tiegħek tista’ ddum sa 24 siegħa sakemm tingħata lura. Il-konnessjoni mill-ġdid tista’ tieħu anke aktar waqt sitwazzjonijiet ta’ emerġenza, ngħidu aħna waqt kundizzjonijiet gravi tat-temp, meta t-timijiet ta’ appoġġ tekniku tagħna jkunu jridu jagħtu prijorità lit-talbiet aktar urġenti ta’ klijenti oħra.

Din it-twissija finali ma tintbagħatlekx jekk tonqos milli tħallas għal elettriku mhux irreġistrat minħabba serq (jew irregolaritajiet oħra), jew jekk ma tonorax ftehim ta’ ħlas. F’dawn iż-żewġ każijiet, nistgħu nissospendu l-provvista tiegħek mill-ewwel

Jekk ma tħallasx id-djun tiegħek u l-provvista tiegħek tiġi sospiża, ir-rikonnessjoni tista’ sseħħ biss ladarba tissodisfa l-kundizzjonijiet indikati fl-avviż tas-sospensjoni, inkluż il-ħlas tad-djun pendenti u l-imgħax akkumulat (jew l-iffirmar ta’ ftehim ta’ ħlas bin-nifs) kif ukoll il-miżati applikabbli għall-ħlas tard u biex tingħata lura l-provvista.

Il-qtugħ tal-provvista ma jneħħilekx l-obbligu li tħallas il-kontijiet li jkun għad fadallek.      Jekk il-kont tiegħek jibqa’ sospiż għal aktar minn sitt xhur, malli tħallas id-djun dovuti, ikollok bżonn tipprovdi, spejjeż tiegħek, ċertifikazzjoni teknika tassistema interna tal-elettriku tiegħek minn provveditur awtorizzat (elettriċista liċenzjat) jew (skont kif meħtieġ) inġinier tal-elettriku awtorizzat, sabiex il-provvista tingħatalek lura Jekk l-ammonti dovuti ma jitħallsux, aħna nieħdu aktar passi biex niżguraw li d-djun tiegħek jitħallsu. Jekk il-kont tiegħek jibqa’ sospiż għal aktar minn sitt xhur, ladarba tħallas id-djun dovuti, inti tkun trid tipprovdi, spejjeż tiegħek, ċertifikazzjoni teknika tas-sistema tal-elettriku interna tiegħek minn elettriċista liċenzjat jew minn inġinier bil-warrant, qabel ma tkun tista’ terġa’ tingħatalek il-provvista wara l-ħlas tal-djun dovuti.

Jekk tonqos ripetutament milli tħallas il-kontijiet tiegħek fil-ħin, aħna nirriżervaw id-dritt li nintroduċu miżuri addizzjonali sabiex inħarsu l-interessi tagħna.

Tista’ tirreferi għar-Regolamenti fuq il-Provvista tal-Elettriku (L.S.545.01) jew iżżur www.smartutilities.com.mt għal aktar dettalji.

Mistoqsijiet u nuqqas ta’ qbil dwar il-kontijiet
L-ARMS hija impenjata li tassigura li l-kontijiet li inti tirċievi jkunu preċiżi u faċli biex tifhimhom. Jekk għandek xi mistoqsijiet dwar il-kontijiet tiegħek, tista’ tikkuntattja lill-ARMS għal aktar assistenza.

Jekk tħoss li l-kontijiet tiegħek jeħtieġ li jiġu rieżaminati, inħeġġuk tinforma lill-ARMS immedjatament. Aħna nirrakkomandawlek li tħallas l-ammont li tħoss li verament għamilt, sakemm il-problema tiegħek tiġi solvuta. B’hekk tevita l-konsegwenzi ta’ nuqqas ta’ ħlas imsemmija aktar ’il fuq, jekk jinstab li t-talba tiegħek ma kinitx ġustifikata.

Jekk il-kwistjoni pendenti tiegħek tkun ibbażata fuq argumenti validi u raġonevoli, aħna nevitaw li naqtgħulek il-provvista sakemm il-kwistjoni tiġi solvuta. Madankollu, jekk in-nuqqas ta’ qbil tiegħek ma jkunx ġustifikat, aħna nirriżervaw id-dritt li nieħdu kwalunkwe azzjoni applikabbli skont il-liġi, inkluża s-sospensjoni tal-provvista, biex nirkupraw il-ħlasijiet dovuti.

Jekk naqtgħulek il-provvista minħabba nuqqas ta’ ħlas jew kwalunkwe irregolarità oħra, it-tariffa applikabbli tas-servizz xorta tibqa’ tiżdied fil-kontijiet tiegħek anki waqt li s-servizz ikun sospiż.

Jekk ma tkunx sodisfatt bir-rieżami tal-kont tiegħek mill-ARMS, tista’ tikkunsidra metodi oħra ta’ soluzzjoni tal-problemi li huma disponibbli għall-klijenti tagħna.

Tneħħija tar-responsabbiltà
Jitneħħielek l-obbligu li tkompli tħallas it-tariffa għas-servizz u t-tariffi tal-konsum biss meta ttemm il-proċedura xierqa tal-ARMS biex twaqqaf is-servizz, li tinkludi t-tneħħija tal-meter tal-elettriku u t-tagħmir relatat u tħallas id-djun kollha pendenti. Jekk tabbanduna l-proprjetà tiegħek mingħajr ma l-ewwel twaqqaf is-servizz tiegħek permezz ta’ dan il-proċess, inti tibqa’ responsabbli għall-ħlas tat-tariffa annwali għas-servizz, kif ukoll l-elettriku li jiġi kkunsmat minn terzi persuni.

Sistemi tal-enerġija rinnovabbli konnessi mal-grid

Bħala l-operaturi tan-netwerk tal-elettriku, aħna responsabbli sabiex nipprovdulek it-tagħmir ta’ metraġġ u konnessjoni neċessarju biex tuża l-ġeneraturi tal-enerġija rinnovabbli tiegħek (bħat-turbini tar-riħ jew il-pannelli fotovoltajċi), biex tixħet l-elettriku fil-grid.

Il-ġeneraturi tal-enerġija rinnovabbli konnessi mal-grid huma regolati mir-Regolatur għas-Servizzi tal-Enerġija u l-Ilma. Qabel ma tqabbad sors tal-enerġija rinnovabbli (RES), bħall-pannelli fotovoltajċi, mal-grid nazzjonali tal-elettriku, inti trid tikseb approvazzjoni bil-miktub mir-Regolatur għas-Servizzi tal-Elettriku u l-Ilma (REWS).

Għal aktar informazzjoni dwar l-awtorizzazzjonijiet regolatorji meħtieġa għal ġeneraturi ġodda tal-enerġija rinnovabbli konnessi mal-grid, irreferi għall-formoli tal-applikazzjoni tal-ARMS li ġejjin għall-konnessjoni ta’ dawn is-sistemi, jew żur www.rews.org.mt.

Approażżjoni ta’ sistemi akbar minn 16 A għall kull phase
Għal kwalunkwe sistema tal-enerġija rinnovabbli (RES) akbar minn 16 Amperes kull phase (> 16A/Phase), inti tkun trid ukoll dokument tal-Ebda Oġġezzjoni mingħand Enemalta plc. Biex tagħtik dan id-dokument, l-Enemalta twettaq studju tal-konnessjoni mal-grid.

Din il-gwida tispjega l-proċedura segwita mill-Enemalta biex twettaq l-istudju tal-konnessjoni mal-grid u tipprovdi d-dokument tal-Ebda Oġġezzjoni u xi dettalji importanti oħra relatati:

Jekk inti interessat li tikkonnettja RES mal-grid nazzjonali tal-elettriku, ikollok bżonn titlob l-approvazzjoni tar-REWS. Il-formoli tal-applikazzjoni u dettalji addizzjonali huma disponibbli hawnhekk.

Ladarba r-REWS japprova l-applikazzjoni tiegħek, inti tiġi ggwidat biex tapplika għand l-Enemalta permezz ta’ email fuq resconsult.em@enemalta.com.mt bid-dokument “Dettalji għad-DSO” maħruġ mir-REWS.  L-Enemalta mbagħad tipprovdi l-feedback neċessarju u/jew id-dokument tal-Ebda Oġġezzjoni fiż-żminijiet speċifikati fil-Gwida għall-Proċess ta’ hawn fuq.

Mhuwiex eskluż li applikant ikun jixtieq iwettaq studju preliminari tal-konnessjoni mal-grid għal skopijiet ta’ fattibbiltà qabel ma jagħmel talba lir-REWS. L-applikazzjonijiet għal ġeneraturi mqabbda mal-grid li ma jkunux se jibbenefikaw minn skema ta’ Feed-in Tariff, eż. Impjant ta’ koġenerazzjoni (CHP) jew PV maħsub biss għall-użu proprju, għandu jkollhom studju tal-grid ma’ Enemalta Plc qabel japplikaw għand ir-REWS. L-allokazzjoni proprja tal-grid issir ladarba inti tidħol fi ftehim mal-Enemalta plc fuq resconsult.em@enemalta.com.mt

Meta l-affarijiet imorru ħażin

It-tim tagħna li joffri assistenza għall-klijenti kif ukoll it-tim ta’ tekniċi huma mħarrġa kontinwament sabiex jassistuk kull meta tesperjenza diffikultajiet waqt li tuża s-servizzi tagħna.

Qtugħ fil-provvista u emerġenzi tekniċi oħra 
Jekk il-provvista ġiet interrotta, trid iċċemplilna fuq il-linja ta’ assistenza tagħna 24 siegħa kuljum, 8000 2224 jew iżżur il-paġna dwar il-qtugħ fil-provvista minn fuq dan is-sit elettroniku. It-tim tagħna li joffri assistenza għall-klijenti jiggwidak permezz ta’ diversi passi sabiex jiddetermina l-kawża tal-qtugħ tal-provvista tiegħek. Dan jista’ jkun ikkawżat minn operazzjoni ppjanata ta’ manutenzjoni fuq in-network fiż-żona tiegħek, nuqqas ta’ ħlas tal-kontijiet pendenti, ħsara fiċ-ċirkwit tal-elettriku intern tiegħek jew ħsara fid-distribuzzjoni tal-elettriku li tforni l-proprjetà tiegħek.

Meta tirrapporta qtugħ, nistgħu ngħarrfuk li nafu b’din l-interruzzjoni fiż-żona tiegħek u li t-tekniċi tagħna qed jaħdmu sabiex iġibu lura l-provvista. F’każijiet oħra, – pereżempju, jekk problema teknika qed taffettwa biss il-provvista tal-elettriku lill-proprejtà tiegħek – ngħarrfu lit-tekniċi tagħna sabiex jidentifika l-ħsara u jġib lura mill-iktar fis il-provvista tiegħek.

Tista’ wkoll tagħmel kuntatt magħna jekk tixtieqna ngħinuk dwar diffikultajiet oħra relatati, bħal:

• tirrapporta konnessjonijiet mhux imqabbdin sew, dawl iteptep jew diffikultajiet tekniċi oħra fil-provvista tal-elettriku tiegħek;

• tgħarrafna dwar apparat tal-elettriku bil-ħsara jew ta’ periklu, inkluż linji ta’ barra maqtugħin, linji mdendlin fil-baxx, brackets tal-cables imqaċtin u xrar tan-nar;

• titlob għajnuna ta’ emerġenza jew sabiex tiġi skonnettjata l-provvista minħabba ħsara serja lill-proprjetà tiegħek (inkluż nar);
• tirrapporta diffikultajiet fil-meter f’każ li jieqaf jirreġistra l-konsum u meta s-siġilli tal-meter ikunu maqtugħin jew neqsin.

Nissettjaw l-affarijiet sew 
Kemm-il darba ma tkunx soddisfatt b’wieħed mis-servizzi tagħna jew inkella bil-livell ta’ assistenza li nipprovdulek, jekk jogħġbok għarrafna u agħtina l-opportunità sabiex intejbu l-esperjenza tiegħek. Agħmel kuntatt magħna permezz tal-posta elettronika (email), ċemplilna jew żur l-uffiċini tat-tim tagħna li joffri assistenza għall-klijenti, ħalli nkunu nistgħu nieħdu l-azzjoni meħieġa sabiex intejbu s-servizzi tagħna lilek filwaqt li jiġu evitati sitwazzjonijiet simili ma’ klijenti oħra.

Filwaqt li nifhmu d-diżappunt tiegħek, nitolbuk ġentilment tibqa’ kalm u tesprimi n-nuqqas ta’ sodisfazzjon tiegħek bl-edukazzjoni. Jista’ jkun li ma nkunux nistgħu noffrulek soluzzjoni immedjata, b’mod partikulari jekk tkun qed tikkuntattjana bit-telefon. Madanakollu, aħna nżommu l-impenn tagħna li nikkuntattjawk lura f’perjodu ta’ żmien raġonevoli u ngħarrfuk bl-azzjonijiet li ttieħdu sabiex tissolva l-problema tiegħek.

Talba għad-danni
Jekk tħoss li wieħed mis-servizzi tagħna, operazzjonijiet jew impjegati ikkawżalek danni fil-proprjetà jew oġġetti personali, tista’ tissottometti Applikazzjoni għal Talba għad-Danni lit-tim tagħna li joffri assistenza għall-klijenti. Aħna ninvestigaw it-talba tiegħek u naraw fid-detall il-każ kollu u regolamenti oħra relatati. Jekk insibu li aħna responsabbli mid-danni li ġarrabt skont it-termini tal-leġislazzjoni applikabli, noffrulek kumpens xieraq.

Tista’ ssib iktar dettalji dwar il-proċedura tal-kumpens tagħna fil-formula ta’ applikazzjoni għal talba għad-danni:

Ma jiġux ikkunsidrati talbiet li jirriżultaw mhux raġonevoli jew mhux ġustifikati, jew talbiet li m’humiex sostenuti b’evidenza xierqa u dokumentata tad-danni mġarrba.

Bord Konsultattiv 
Jekk ma tkunx sodisfatt bid-deċiżjoni tagħna dwar it-talba għad-danni, dwar il-kontijiet pendenti tiegħek jew xi kwistjoni oħra relatata mas-servizzi tagħna, tista’ titlob li l-każ jerġa’ jiġi kkunsidrat minn Bord Konsultattiv independenti.

Tista’ tissottometti l-appell tiegħek lil Bord Konsultattiv billi tissottometti l-Formula ta’ Applikazzjoni Bord Konsulattaiv lit-tim tagħna li joffri assistenza għall-klijenti.

Dan il-Bord jista’ jirrevedi l-każijiet li jinvolvu talbiet għal kumpens li jammontaw sa massimu ta’ €3,500. Dan jagħtik l-opportunità li tispjega l-każ tiegħek filwaqt li jikkunsidra l-pożizzjonijiet tal-partijiet kollha involuti, inklużi Enemalta u ARMS. Fi żmien ftit ġimgħat, il-Bord ifassal rapport bir-rakkomandazzjonijiet tiegħu.

Aħna nikkunsidraw ir-rakkomandazzjonijiet ta’ dan il-Bord u nieħdu azzjoni kif meħtieġ. Inti tirċievi wkoll kopja ta’ dawn ir-rakkomandazzjonijiet.
Tista’ wkoll tagħżel li tissottometti l-ilment tiegħek għal riżoluzzjoni ta’ tilwim mir-Regolatur għas-Servizzi tal-Enerġija, kif specifikat fir-Regolamenti dwar il-Proċeduri għad-Determinazzjoni ta’ Kwistjonijiet (L.S.545.30).

Servizzi Oħra

Taf tiġi bżonn servizzi oħra tal-elettriku mill-Kumpanija tagħna. Aħna impenjati li noffru dawn is-servizzi bi prezz ġust u fi żmien raġonevoli. Biex titlob wieħed minn dawn is-servizzi, jekk jogħġbok imla l-formola tal-applikazzjoni xierqa u ssottomettiha lill-ARMS. Kull formola tal-applikazzjoni tinkludi dettalji dwar ir-regolamenti u t-termini u l-kundizzjonijiet relevanti kif ukoll lista ta’ dokumenti li huma neċessarji għas-servizz li tkun interessat fih.

Dawn huma xi wħud mis-servizzi li tista’ tiġi bżonn:

Tibdil fis-Servizz tal-Elettriku
Dan is-servizz jintalab meta jkollok bżonn iżżid jew tnaqqas il-load tal-provvista tal-elettriku tiegħek, jew meta jkollok bżonn iċċaqlaq il-meter tal-elettriku tiegħek għal post ieħor fil-qrib, fl-istess proprjetà.

Tneħħija tas-servizz
Dan is-servizz huwa meħtieġ meta ma jkollokx aktar bżonn il-provvista tal-elettriku li nipprovdulek u tkun tixtieq tneħħi l-meter u t-tagħmir relatat kollu. Din il-formola trid tiġi sottomessa dejjem meta bini pprovdut b’servizz tal-elettriku mill-Enemalta jkun se jitwaqqa’.

Devjazzjoni/Gaiters/Tifi ta’ Feeder ta’ Vutaġġ Baxx
Permezz ta’ dawn is-servizzi, aħna nistgħu ngħinuk billi niddevjaw jew ngħattu linji tal-elettriku li jkunu qrib siti jew bini, biex inti tkun tista’ twettaq xogħlijiet ta’ manutenzjoni, twaqqigħ jew kostruzzjoni b’mod sigur. F’ċerti każijiet, inti tista’ titlob ukoll l-iskonnettjar b’mod temporanju ta’ kejbils ta’ vultaġġ baxx li jgħaddu minn jew qrib sit jew bini, biex twettaq xogħlijiet simili b’mod sigur.

Formoli tal-applikazzjoni għal servizzi oħra